2019-02-21 15:04:58

Баянхонгор /МОНЦАМЭ/. Баянхонгор аймгийн Шагайн холбооны тэргүүн Бэгзсүрэнгийн Энхтүвшинтэй ярилцлаа.

-Аймгийн Шагайн холбоо сүүлийн жилүүдэд нэлээд идэвхжиж улс, бүсдээ олон амжилт үзүүлж одтой наадаж байна. Харин та ямар байдлаар Шагайн холбоотой холбогдов? 

-Нэлээд эртнээс би Бууцагаан сумын залуучууд оюутнуудын дунд хоёр төрөлт тэмцээн зохион байгуулдаг байсан. Ер нь сум орон нутгаас, аймгаас нийслэл рүү тэмцээн уралдаанд явахад “Та ивээн тэтгээч. Зардал мөнгөний тусламж үзүүлээч” гэж хүмүүс их ханддаг. Манай аав ч шагай тоглодог байсан юм л даа. Сумын шагайчдын тавьсан саналаар аавынхаа нэрэмжит шагайн тэмцээнийг ивээн тэтгэж, Хангайн бүсийн Буянтын тойром наадмыг 2014 оноос хойш сумандаа зохион явуулсан. Хоёр жилийн дараа буюу 2016 онд аймгийн шагайчдаас Шагайн холбоог удирдах санал тавьж, би ч зөвшөөрсөн. Тэгээд бид анхныхаа цомын тэмцээнийг 2017 оны нэгдүгээр сард зохион байгуулж байлаа. Хавар нь аймгийн аваргаа зохион байгуулсан. Тэгээд 2017 оны Улсын аварга шалгаруулах тэмцээн, наадамд гурван баг сар гаруй бэлтгэж оролцуулсан. Тэд маань өндөр амжилт гаргаагүй хэдий ч 80 гаруй багаас шилдэг 16-д шалгарч их урам орцгоосон.

-Шагайн харвааг сонирхогчдын хүрээ тэлж байгаа нь анзаарагдсан?

-Манай шагайн холбоо аймгийнхаа болон сумдын тэмцээнийг зохион байгуулдаг болоод ирсэн чинь сонирхогчдын хүрээ ч тэлсэн. Долоо хоногийн пүрэв гараг бүр н.Загдсүрэн гэдэг залуу харваач цуваа харвааг явуулдаг. Ингэснээрээ тэрээр 2017 оны улсын аваргаар цуваа харваанд түрүүлж, Монгол Улсын мэргэн цол хүртсэн байгаа. Манай шагайчид ч маш их хичээл зүтгэл гаргаж дайчлан ажиллаж, бэлтгэл сургуулилтаа ч сайн хийсний дүнд улсын аваргын тэмцээнд цуваа харваагаар дэд болон тусгай байр эзэлсэн. Эрчүүд маань цолоо ахиуллаа. Чундо багийн харваачид улсын баяр наадмаар хүрэл медаль хүртэж, 2017, 2018 онд 10-12 шагайчид улсын цол зэрэг авсан. Улсын цол зэрэгтэй нь ахиуллаа. Манай харваачдаас Монгол Улсын Дархан мэргэн төрлөө. Ахмад харваачид маань ч сайхан дэмжиж, зөвлөн ажиллаж байна.

-Шагайн харваагаар хичээллэхийн ач тус нь юу вэ?

-Шагайн харваан үүслийг нүүдэлчдийн соёл иргэншилтэй чацуу гэж үздэг. Тэр ч утгаараа нүүдэл суурьшлын зохицохуйд оршиж чаддаг, нэг нь нөгөөдөө хүндэтгэл үзүүлэх урам хайрлахын ур ухааныг уухайгаараа илэрхийлж байдаг  үндэсний соёлын үнэт өв болон хөгжиж ирсэн түүхтэй. Мөн хамгийн бага хөрөнгө зардлаар олон мянган хүнийг нэгэн зэрэг наадан цэнгүүлж болдогоороо бас онцлог. Эртнээс уламжлагдаж ирсэн зан заншлыг тээхийн зэрэгцээ ой ухааныг хөгжүүлэх, бие биедээ хүндэтгэлтэй хандах харилцааны өндөр соёлыг эзэмшүүлэх өндөр ач холбогдолтой наадгай юм.

-Өнгөрсөн онд Монгол Улсын Тэргүүний шагайн холбоогоор танай холбоо шалгарсан байсан. Үйл ажиллагааг тань сайшаасан хамгийн том үнэлэлт байх шүү.

-Шагай харваачид маань сайхан эвлэлдэн нэгдэж, 1000 шагайчдын чуулга уулзалт буюу Ламын гэгээний тойрмыг зохион байгуулсан юм. Ламын гэгээнийхээ тойрмыг өнгөрсөн оны намар Баянхонгор аймгийнхаа Түйн голын хөвөөнөө Оготнотой булгийн өргөн ширэг дээр зохион байгуулж, Халхын сайхан харваачдыг бүрнээ хамруулж чадсан. Монгол Улсын даяар дуурсах дархан мэргэн маань хоёулаа  ирсэн. Улсын цолтой 70 гаруй, аймгийн цолтой 100 гаруй харваач оролцсон өргөн сайхан наадам болж, Халхын харваачид “Хонгор нутаг уул ус, ургамал ногоо, горхи рашаан нь дэлгэрсэн сайхан хангай байна. Ард иргэд нь сэтгэл сайтай хүмүүс байдаг юм байна” гэж ам сайтай, сэтгэл хангалуун буцацгаасан. 2000 гаруй хүн цугласан байсан. Зөвхөн Баянхонгор аймгаас гэхэд 54 баг оролцсон шүү дээ. Бусад аймгаас 400 гаруй шагайчид хүрэлцэн ирсэн. Энэ ажил үйлсийг минь Монгол Улсын шагайн холбоо үнэлж, 2018 оны “Монгол Улсын Тэргүүний шилдэг шагайн холбоо”-гоор шалгаруулсан.

-Ламын гэгээний тойром цаашид үргэлжлэх үү.

-Энэ онд Ламын гэгээний 380 жилийн тэгш ой тохиож байгаа. Ламын гэгээний тойрмыг тус ойн хүрээнд зохион байгуулахаар төлөвлөж байна. Харин үүнээс хойш тойрмоо хоёр жилд нэг удаа хийдэг болъё гэж тогтсон.

-Шагайн сэдвээсээ хазайгаадахъя. Аймагт маань таны оролцоотойгоор орчин үеийн шийдэл бүхий худалдаа, үйлчилгээний төв баригдаж буй. Ашиглалтад хэзээнээс орох бол?

-Аймгийн ИТХ-ын даргаар ажиллаж байсан Ж.Ганхүлэг  найзтайгаа хамтарч Баянхонгор аймагт орчин үеийн шаардлага, стандартад нийцсэн худалдаа үйлчилгээний төвийн барилгыг барьж байна. Барилгын ажлын гүйцэтгэл 90 хувьтай явж байгаа. Оны өмнө ашиглалтад оруулах байсан ч харамсалтай нь гадна шилэн пасадны ажлын саатлаас болж гурван сарын хугацаа алдчихлаа. Одоо энэ нэгдүгээр улиралд ашиглалтад өгөхөөр ажиллаж байна.

-Хэчнээн ажлын байр бий болох вэ.

-Энд шууд ажлын байр 500 орчим, дам ажлын байр 1000 орчим бий болох тооцоо төлөвлөгөө бий шүү.

Б.Мөнхзул

эх сурвалж: https://montsame.mn/