Улс хувьсгалын 25 жилийн ойн баяраар Яармагийн дэнжид шагайн харваа болж Дорноговь аймгийн Сайхандулаан сумын уугуул Ёндонбаа, Даланжаргалан сумын “япон” Сайнбуян хоёр хоёулаа 20 хонож тэнцээд сум уралдуулах болж 1 хасаанд 9 тохойгоос ижилхэн 22 онож, дахин тохой сунгаж 10 тохойгоос харвуулахад мөн адилхан онож харвахад нь тохой татаж 8 тохойгоос харвуулахад Ёндонбаа, “япон” Сайнбуян хоёулаа байтуултал Сайнбуянгийн оносон хасаа нэлээн удаан өнхөрч өнхөрч ойчсонд Маршал Х.Чойбалсан баяр хүргэж Сайнбуянг зурхай, тохой, хасаагаар шагнасан юм гэнэ лээ. Шагналд өгсөн нэлгэр хүрэн зурхайн тал нь Ц.Шаравдорж гуайд хадгалагдаж байдаг бол бичигтэй тал нь Дорноговь аймгийн Иххэт суманд ахмад харваач Даваа гуайн харваач хүүхдүүдэд хадгалагдаж байдаг юм байна.
Ц.Шаравдорж “Монгол шагайн домогт харваач” номоос