“АХМАДЫН ЦОМ-2022” үндэсний шагайн харвааны уламжлалт тэмцээн 2022 оны 10 дугаар сарын 30-ны өдөр Чингэлтэй дүүргийн Хайрхан-2 хөгжлийн төвд амжилттай зохион байгуулагдав. Энэ удаагийн тэмцээнд 17 багийн 120 орчим ахмад харваачид цэц мэргээ сорьсноос Монгол улсын харьшгүй мэргэн Н.Төмөрбаатар ахлагчтай Төв аймгийн баг тэргүүн байр, Монгол улсын харьшгүй мэргэн Ж.Чулуун ахлагчтай Дорноговь аймгийн баг дэд байр, Монгол улсын харьшгүй мэргэн А.Шийтэр ахлагчтай Налайх дүүргийн баг гутгаар байрт тус тус шалгарлаа. МШХХ-ны тэргүүн дэд ерөнхийлөгч МУҮДМэргэн, спортын мастер Ш.Отгонбаяр, ерөнхий нарийн бичгийн дарга МУХМэргэн А.Энхжаргал нар тэмцээнийг нээн үг хэлж ахмад харваачдадаа урт удаан наслахын ерөөл өргөсөн бол МШХХ-ны нийслэлийн салбар холбооны тэргүүн МУХМэргэн Р.Ганболд Чингэлтэй дүүргийн 30 жилийн ойн нэрэмжит гарын бэлгийг ахмад харваачдадаа гардуулан өгч хүндэтгэл үзүүллээ. Тус тэмцээний ерөнхий шүүгчээр МШХХ-ны хүндэт ерөнхийлөгч, МУСГЗ, МУҮДМэргэн, спортын мастер Д.Басхүү ажилласан бөгөөд шалгарсан багуудын шагналыг МШХХ-ны хүндэт ерөнхийлөгч, МУҮДМэргэн Я.Батсуурь гардуулсан нь онцлог үйл явдал байлаа.