Эзэн богд Чингис хааны мэндэлсний 860 жилийн ой, “МОНГОЛ БАХАРХАЛ”-ын өдөрт зориулсан үндэсний шагайн харвааны тэмцээн 2022 оны 11 дүгээр сарын 26, 27-ны өдрүүдэд Монголын Буудлага Спортын холбооны төв зааланд амжилттай зохион байгуулагдав. Тус өдөрт зориулсан тэмцээнийг МШХХ-оос жил бүр уламжлал болгон зохион байгуулсаар ирсэн бөгөөд энэ удаагийн тэмцээнийг хүнсний ууган манлай үйлдвэр “АПУ” ХК ивээн тэтгэсэн юм. Нийслэл, орон нутгаас 68 багийн харваачид ирж оролцсон дэлгэр сайхан тэмцээн боллоо. Тэмцээний тэргүүн байрт Өмнөговь аймгийн Гурвантэс сумын харьяат МУ-ын Мэргэн Т.Сонинбаатар ахлагчтай “ИХ ЭРХЭТ ГОВЬ” ХХК-ий баг, дэд байрт Хэнтий аймгийн Баянмөнх сумын харьяат МУ-ын Хошой Мэргэн Б.Амгаланбаяр ахлагчтай ХАН ХЭНТИЙ баг, гутгаар байрт Өмнөговь аймгийн Цогтцэций сумын харьяат МУ-ын Хошой Мэргэн Ч.Буянжаргал ахлагчтай “АЛТАНГОВЬ ТРАНС” ХХК-ий баг, шагналт байрт Дорноговь аймгийн Хөвсгөл сумын харьяат МУ-ын Үлэмж дархан Мэргэн Б.Баттулга ахлагчтай “НОМТ ДАНШИГ” ХХК-ий багууд тус тус шалгарлаа.

Тэмцээний Ерөнхий ивээн тэтгэгчээр хамтран ажилласан Хүнсний ууган манлай үйлдвэрлэгч “АПУ” ХК-ий удирдлагууд хамт олонд нийт харваач, өвлөн тээгчдийнхээ нэрийн өмнөөс гүн талархал илэрхийлье!

Мөнх хөх тэнгэрийн доор

Монгол шагайн харваа түгэн дэлгэрэх болтугай.

НИЙТ ХАРВААЧДАДАА САЙН САЙХНЫГ ХҮСЭН ЕРӨӨЕ!